Эрүүл мэндийн яамнаас коронавирусийн талаарх ээлжит мэдээлэл хийлээ. Энэ үеэр ЭМЯ-ын ахлах шинжээч Ц.Нарангэрэл “Коронавирусийн халдвар дэлхий дахинд эрчимтэй хэвээр байна. Манай хөрш орнуудад өвчлөл их байгаа төдийгүй ОХУ-д сүүлийн 10 хоног халдвар харьцангуй багасах шинжтэй байгаа. ОХУ-д сүүлийн 24 цагт 24763 тохиолдол бүртгэгджээ. Харин БНХАУ-д нэг өдөрт 179 буюу ялимгүй өвчлөл ихэссэн хандлагатай байгаа бөгөөд БНХАУ-д зургаан сарын дараа нас баралт бүртгэгдсэн. Тэр тусмаа Бээжинтэй залгаа Хубэй мужид 20 сая гаруй хүн хатуу хөл хорионд байна. Норвег Улсын судлаачид дэлхий дахинд коронавирусийн шинэ мутацид орсон хувилбар илүү тархаж байна гэж үзжээ. Энэ шинэ хувилбар нь 70 хувь илүү тархалттай байна хэмээн тогтоогоод байгаа билээ. Одоогоор коронавирусийн шинэ хувилбар дэлхийн 50 гаруй оронд бүртгэгдээд байна” гэв.

Түүнчлэн олон хүн цугларсан, бөөгнөрсөн үйл ажиллагаанд мутацид орсон хувилбар илүү хурдтай тархаж буй аж. Тухайлбал, БНСУ-д сүмийн үйл ажиллагааны голомтоос сүүлийн хоёр хоногт 700 гаруй хүн коронавирусийн халдвар аваад байна. Үүнээс үүдэн Норвегийн эрдэмтэд болон ДЭМБ “2021 он коронавирусийн тархалт өндөртэй, хүнд хэцүү жил болно” гэж үзжээ. Дэлхийн олон оронд эмч, эмнэлгийн орны ачаалал эрс нэмэгджээ. Их Британид эмч, эмнэлгийн ажилтнуудын сэтгэл зүйд судалгаа хийсэн бөгөөд судалгаанд 700 гаруй эмч, эмнэлгийн ажилтнууд хамрагдахад эмч нарын 50 гаруй хувь нь стресст орж, амьдрах хүсэлгүй болж, өөрийгөө ямар нэгэн байдлаар гэмтээх  бодлууд төрж, ажиллах чадвар буурсан зэрэг үр дүн гарчээ. Тиймээс ДЭМБ-аас эмнэлгийн ажилчдаа дэмжих, цаг наргүй ажлыг үнэлэх, эмч нартаа сэтгэл зүйн дэмжлэг өгөх хэрэгтэй гэж зөвлөжээ.