2017 онд Хэнтий аймгийн Батноров суманд "Андлалын өргөө" цогцолбор барихаар 1.9 тэрбум төгрөг төсөвлөж, ажил нь эхэлсэн ч зохиогчийн эрхийн маргаанаар барилгыг нураасан билээ. Тэгвэл "Андлалын өргөө"-ний суурин дээр "Тэнгэрийн андгай" шинэ цогцолборыг байгуулжээ. 

Хоёр сарын дотор баригдсан “Тэнгэрийн андгай” цогцолборын талаар Хэнтий аймгийн ЗДТГ-аас дараах мэдээллийг гаргажээ.

          “2017 онд Хэнтий аймгийн Батноров суманд "Андлалын өргөө" цогцолбор барихаар 1.9 тэрбум төгрөг төсөвлөж, ажил нь эхэлсэн ч зохиогчийн эрхийн маргаанаар барилгын ажлыг зогсоосон. Тэгвэл иргэдийн хандиваар Андлалын өргөөний суурин дээр хоёр сарын дотор шинэ Андлалын өргөөг байгууллаа. Тэмүүжин Боорчи нарын анд барилцсан газрыг "Хөхүүрийн хөндий" хэмээн Монголын нууц товчоонд тэмдэглэсэн байдаг. Тэгвэл Андлалын өргөөг энэ хөндийн уулын хэвлийд аль болох нөмөртэй газар сонгож барьжээ. Мөн Андлалын хөшөөгөөр Монгол морьтон соёлыг дэлгэрүүлж шинэчлэх санааг эхлүүлсэн. Тухайлбал, Андлалын хөшөөг тойрсон морины найман зан үйлийн байгууламж байна. Боржин чулуун сийлбэрт ерөөл магтаал, морины холбогдолтой зан үйлийн үгс бичигдэж, морины уяа байгуулах юм” хэмээсэн байна.

Харин бид Батноров сумын Засаг дарга Д.Жадамбаатай холбогдоход “Андлалын хөшөөг нураасан өдрөөс бүтээн байгуулалт эхэлж, одоогийн байдлаар дуусах шатандаа орж байна. Бүтээн байгуулалтын ажлын ихэнх хувь дууссан ч, тохижилт, үйлчилгээний ажил дутуу байгаа. Одоогоор орон нутгийн удирдлагад уг бүтээн байгуулалтыг хүлээлгэж өгөөгүй байна. Ирэх хавраас бүрэн дуусах юм шиг байна лээ. Хэнтий аймгийн нутгийн зөвлөлөөс уг ажлыг хариуцаж, ажилласан учраас төсөв санхүүг мэдэхгүй. Иргэдийн хандиваар уг бүтээн байгуулалтыг хийсэн. Орон нутгийн удирдлагууд ч тодорхой хэмжээнд хандив өргөсөн” гэлээ.

            Тэгвэл тус бүтээн байгуулалтыг хариуцаж ажилласан гэх Хэнтий аймгийн нутгийн зөвлөлийн удирдлагаас мэдээлэл авах гэсэн боловч татгалзлаа. Тэд “Одоогийн байдлаар иргэдээс хэчнээн төгрөгийн хандив цугларсан нь тодорхойгүй байна. Өөрөөр хэлбэл, санхүүгийн тооцоо нэгдсэн байдлаар гараагүй байна” гэлээ.

Ташрамд дурдахад, Хэнтий аймгийн нутгийн зөвлөлийн даргаар Ерөнхий сайд Л.Оюун-Эрдэнэ, гүйцэтгэх захирлаар Соёлын дэд сайд Д.Батбаяр нар ажилладаг юм.