Өнөөдөр өглөөний 05:35 минутын орчимд Хөвсгөл, Дархан, Эрдэнэ, Улаанбаатар орчимд газар хөдлөлтийнхүчтэй чичирхийлэл мэдрэгдлээ. Тодруулбал, Олон Улсын газар хөдлөлтийн судалгааны байгууллагын мэдээллээр нэгдүгээр сарын 12-ны өдөр ОХУ, Монгол улсын хилийн орчимд орон нутгийн цагаар 5:32 минутанд 6.8 баллын хүчтэй газар хөдлөлт болсон гэж бүртгэгджээ. Газар хөдлөлт гурван удаа болсон бөгөөд 5:52 минутанд 5.2 балл, 6:02 минутанд 5 баллын газар хөдлөлтүүд тус, тус мэдрэгджээ. 

Газар хөдлөлтийн аюул тохиолдохоос өмнө юу хийх вэ?

• орон сууцанд амьдардаг бол аюулгүй байршлыг урьдчилан тогтоох Жишээлбэл, даацын хана, багана, арк, ариун цэврийн өрөө, хаалга гэх мэтээр
• эд хогшлыг бэхлэх 
• бичиг баримтыг хамтад нь хадгалах, гадагш гарахад шуурхай авах боломжтой газар хадгалах
• аюулгүй байршилд шуурхай хоргодох дадлагыг гэр бүлийн гишүүн бүр хамтдаа хийх
• удаан хадгалах боломжтой хоол хүнсний нөөц бүрдүүлэх 
• ус нөөцлөх
• гар чийдэн, шүгэл, эмийн сан, скоч зэрэг шаардлагатай бусад зүйлийг бэлтгэх
• химийн бодио, тэсэрч дэлбэрэх зүйлийг хадгалахгүй байх 
• хувцас, гутал бэлтгэх 

Газар хөдлөлтийн аюул тохиолдсон үед юу хийх вэ?

Барилга нураагүй үед 

• газар хөдлөлтийн аюул тохиолдсон үед айж, сандрахгүй, тайван байх
• суу, нуугд, хүлээ зарчмыг дагаж мөрдөх
• аюулгүй байршилд яаралтай хорогдох
• газар хөдлөлтийн чичирхийлэл дууссаны дараа гэр бүлээрээ гадагш аюулгүй талбайд очих
• гадагш гарахдаа аваарын шат ашиглах
• цахилгаан шат ашиглахгүй байх 
• гадагш гарахдаа гүйхгүй, түлхэхгүй, буцахгүй, ярихгүй зарчмыг дагах
• бичиг баримт, хоол хүнсийг авч гарах
• захиргааны байгууллагад бүртгүүлэх
• утсаар ярихгүй байх 
• радио сонсох
• цахилгаан, хий, усны шугамд гэмтэл гарсан бол эх үүсвэрийг хаах, салгаад гадагш гарах 

Барилга нурсан үед 

• нуранги дор тайван байх 
• бэртэл гэмтлээ шалгах 
• өөртөө анхны тусламж үзүүлэх 
• нурангин дор ус, хүнсний зүйлийг хямгатай хэрэглэх
• нуранги дороос эрэн хайх ажлыг гүйцэтгэж байгаа хүмүүс, аврагчдад шүгэл үлээж дуу чимээгээр мэдэгдэх
• тамхи татахгүй байх, гал гарч болзошгүй

Газар хөдлөлтийн аюул тохиолдсоны дараа юу хийх вэ?

• гэр бүлийн гишүүд бүрэн гарсан эсэхийг нягтлах
• нэрвэгдсэн хүмүүст тусламж үзүүлэх
• жижиг хэмжээний гал түймэр унтраах болон хоёрдогч хор хөнөөлийг арилгах
• мэргэжлийн байгууллагад дэмжлэг үзүүлэх
• мэргэжлийн байгууллагын заавраар ажиллах
• нийтээр цугларах байранд дэглэм сахих
• үймээн эмх замбараагүй байдлаас сэргийлэх