Завхан аймгийн Алдархаан сумын Богдын гол багийн Яргайтын ам гэдэг газар Ланд 100 маркийн автомашин усанд суусан тухай дуудлагаар тус аймгийн Онцгой байдлын газрын алба хаагчид ажиллаж найман хүний амь, эд хөрөнгийг авран хамгаалжээ.

     Түүнчлэн Завхан аймгийн Онцгой байдлын газар гамшиг ослоос урьдчилан сэргийлэх, эрэн хайх аврах бүлгийнхээ үйл ажиллагааг дэмжиж морьд худалдан авч, эмээл болон бусад дагалдах хэрэгслүүдийг алба хаагчдынхаа хүчээр бэлтгэж эрэн хайх, аврах үйл ажиллагаанд ердийн хөсөг морь, эрэлч нохой ашигладаг болсон байна. Ингэснээр ой хээрийн түймэр, үер усны аюулаас урьдчилан сэргийлэх зорилгоор баяр амралтын өдрүүдэд Улиастай, Алдархаан сумын ногоон бүсэд Богдын гол, Чигистэй голын эргээр морин эргүүлийг ажиллуулж байгаа аж. Аврах ажиллагаанд морь ашигласнаар үр дүнд хүрч байна гэж Завхан аймгийн онцгой байдлын газраас мэдээллээ.