Л.Оюун-Эрдэнийн Засгийн газрын 100 хоног тохиож байна. Ерөнхий сайд Л.Оюун-Эрдэнэ 100 хоногт хэрэгжүүлсэн ажлаа тайлагнаж, сэтгүүлчдийн асуултад хариуллаа. Энэ үеэр “С.Зориг агсны амийг хөнөөсөн хэргийн захиалагчийг зарлах уу” гэх асуултад ЗГХЭГ-ын дарга Ц.Нямдорж мэдээлэл өглөө.

   Тэрбээр “Би 2016 оноос хойш С.Зориг агсны хэрэгт хэлмэгдсэн хүмүүсийн хойноос хөөцөлдөж байна. Монголд шударга ёс, хууль байдгийг үзэх гэж зургаан жил болж байна. Миний зүгээс энэ хэрэг дээр хүмүүс хэлмэгдэж байгаа гэдгийг мэдсэн учраас хэргийн захиалагчийг зарлахыг хууль, хяналтын байгууллагаас шаардсан. Гэвч хэн ч захиалагчийг зарлаж чадаагүй. 2016 онд С.Зоригийн хэргийг мөрдсөн хүмүүс захиалагчийг нь тогтоож чадаагүй хэрнэ, захиалгаар хүн хөнөөсөн гээд Б.Содномдаржаа, Т.Чимгээ нарт ял оноосон. Би “Өдрийн сонин”-д “Хонгил үүссэн түүх ба яргын хэрэг” гэсэн гарчигтай нийтлэл бичиж, оруулсан. Энэ нийтлэл дотор бүх зүйлийг бичсэн байгаа.

2016 онд иргэн Ц.Амгаланбаатарын мэдүүлгээр Э.Бат-Үүлийг энэ хэргийн захиалагч хэмээн шалгасан.

“Нотлогдож байгаа тул” гэсэн үгтэйгээр шалгаж эхэлсэн хэдий ч 20 хоногийн дараа "Нотлогдоогүй" гэсэн тайлбараар яллагдагчаар татсан тогтоолыг хүчингүй болгосон. Ц.Амгаланбаатар 2014 оноос хойш Э.Бат-Үүлийн талаар ярьсан. Гэвч Э.Бат-Үүлээс ямар ч байцаалт аваагүй. Тиймээс би энэ хэрэгт хүн хэлмэгдсэн гэж тууштай үзэж байгаа юм. Үүнд ямар ч эргэлзээ байхгүй. “Өдрийн сонин”-д нийтлэгдсэн нийтлэлийн үг бүр үнэн. Одоо шүүхийн ажилчид энэ хэргийг хэрхэн шийдэхийг би мэдэхгүй байна” гэлээ.