Хөвсгөл аймгийн Ханх сумын төвөөс баруун урд зүгт 21 км зайд байх Хороо багийн Ходон гэдэг газарт  өчигдөр буюу тавдугаар сарын 6-ны өдрийн 13:59 цагт 3.8 магнитуд хүчтэй газар хөдөлжээ.

Тус аймгийн Онцгой байдлын газраар дамжуулан Ханх сумын Засаг даргаас тодруулахад иргэдэд чичирхийлэл бага мэдрэгдсэн бөгөөд хохирол учраагүй байна.

Хөвсгөл аймгийн Ханх суманд өнгөрсөн нэгдүгээр сарын 12-ны үүрээр зургаан удаа газар хөдөлж, иргэдэд хүчтэй чичирхийлэл мэдрэгдэж байсан.  Үүнээс хойш тус суманд удаа дараа газар хөдлөлт болж байгаа билээ. Газар хөдлөлтийн улмаас Ханх сумын 35 айл өрх, Засаг даргын Тамгын газар зэрэгт нийт 10.3 сая төгрөгийн хохирол учирсан болохыг тогтоосон байдаг.