Улаанбаатар хотын Захирагчийн ажлын албанаас хүмүүсийн бөөгнөрөл үүсгэдэг эрсдэлтэй цэг  болох автобусны буудлуудыг угаах ажлыг өчигдөр эхлүүлсэн. Уг ажил өнөөдөр  үргэлжилж байна.

Дэлхий нийтээр тархаж буй цар тахлаас урьдчилан сэргийлэх арга хэмжээг авах чиглэлээр нийслэлийн Засаг дарга бөгөөд Улаанбаатар хотын захирагч Д.Сумъяабазар нийслэлийн Удирдах ажилтнуудын шуурхай зөвөлгөөнөөр хөл хорионы хугацаанд хот, нийтийн аж ахуйн зарим ажлуудыг эрчимжүүлэх үүрэг чиглэл өгчээ.

Энэ дагуу бохирдол ихтэй нийт 72 автобусны буудлыг хоёр бригад гарган, тусгай цэвэрлэгээний бодис, шүршигч төхөөрөмжөөр угааж цэвэрлэж байна. Цаашид нийслэлээс нийтийн эзэмшлийн гудамж талбайд байрладаг автобусны буудлын сандал, хогийн сав, ТҮЦ-үүдийн өнцөг булан бүрийг ариутгал, халдваргүйжүүлэх тусгай цэвэрлэгээний бодис, шүршигч төхөөрөмжөөр  угааж цэвэрлэх ажил хуваарийн дагуу  үргэлжлэх аж.