Хөвсгөл аймгийн Бүрэнтогтох сумын Бүрэнхаан багийн Солонго гэх газарт малчин Б-гийн хаваржаа шатаж, 200 төл мал хорогдсон талаар бид мэдээлсэн. Түймрийг орон нутгийн 15 иргэн, гурван автомашин, дөрвөн мотоциклтой очиж бүрэн унтраасан байна. Энэ талаар бид иргэн Б-тэй холбогдож дараах тодруулга авлаа.

-Өчигдөр танай хаваржаа шатаж, төл мал хорогдсон харамсалтай хэрэг гарчээ. Тухайн үед та гэртээ байгаагүй юм уу?

-Тиймээ би байгаагүй. Аймгийн төв рүү ажлаар явчихсан байсан юм. Ер нь гал унтраах хүн хүч бага байсан дөрвөн том хүн байсан. Нэг нь малдаа явсан хойно гал гарсан байна.  Салхитай өдөр байсан учраас гал маш тархсан байна лээ. Гал юунаас гарч гарсныг эцсийн байдлаар тогтоогоогүй. Гэхдээ яндангийн оч үсэрсэн байх гэж таамаглаж байна. Гал гарсан даруйд нэг хүүхэд маань хажуугийн айлд хэлэхээр явсан гэсэн. Гэтэл 20, 30 минутын дотор л хашаа шатчихсан гэсэн.

-Хамгийн ойрын айл хэдэн км зайтай юм бэ?

-Хамгийн ойрын айл 2-3 км зайтай. Энд сүлжээ муу байдаг учраас хурдан шуурхай мэдээлэл өгч чадаагүй байна лээ. Уг нь ойрхон гол урсдаг. Ус зөөхийн завдалгүй гал алдсан гэсэн. Ингээд ойр орчмын хүмүүс ирж галыг бүрэн унтраагаад байна.

-Хашаанд байсан төл мал бүгд шатсан гэсэн үү?

-Тиймээ. 200 төл шатсан. 150 хурга, ишиг байсан. Хашааны хаалгыг онгойлгож малаа гаргах боломж байгаагүй гэсэн. Гэрт байсан цөөн хэдэн хурга ишиг үлдсэн дээ. Би насаараа л мал дагсан. Харамсалтай үйл явдал боллоо.

Мөн энэ талаар бид Бүрэнхаан багийн Засаг дарга Ч.Энхцогтоос зарим зүйлийг тодруулсан юм. Тэрбээр “Надад 16:00 цагийн үед гал гарсан талаар дуудлага ирсэн. Ингээд би газар дээр нь шуурхай очсон. Анх утсаар дуудлага мэдээлэл ирсэн юм. Үүний дараа сумын төв рүү мэдэгдсэн. Одоо аймгийн онцгой комиссоос хүмүүс ирж байгаа сурагтай байна. Галыг бүрэн унтраасан. Тухайн гал гарсан газар нь сумын төвөөс 70 орчим км газар байдаг. Хоёр айлын 200 төл мал шатсан байна лээ” гэлээ.