Батлан хамгаалах салбар сахилга, хариуцлага, дэг журмыг чангатгах, төрийн албан хаагчийн ёс зүйн түвшинг дээшлүүлэх талаар эрчимтэй ажиллаж байна.

Нэн түрүүнд Зэвсэгт хүчний офицерын бүрэлдэхүүний мэргэшил, ур чадвар, ёс зүйн түвшин тогтоох үзлэгийг 2021 онд зохион байгуулж, офицер нэг бүрийн албандаа хандах хандлагыг өөрчлөн сайжруулах, цэргийн сахилга, хариуцлагыг дээшлүүлэх дэс дараатай арга хэмжээг авч хэрэгжүүлэх талаар Батлан хамгаалахын сайдын тушаал гарч бэлтгэл ажлыг хангаж байгаа аж.

Хоёрдугаарт, Батлан хамгаалахын сайдын дэргэд Зэвсэгт хүчинд тавих иргэний хяналтыг сайжруулахад дэмжлэг үзүүлэх зорилго бүхий “Иргэний зөвлөл”-ийг байгуулахаар болж дүрэм, ажиллах журмын төслийг боловсруулж эхэллээ. Мөн Зэвсэгт хүчний нэгтгэл, анги, салбаруудын цэргийн байр, танхим, бусад барилга байгууламжийг энэ оны хоёрдугаар улиралд багтаан камерын хяналттай болгохоор төлөвлөжээ.