УИХ-ын гишүүн асан Н.Номтойбаяр өнгөрсөн пүрэв гарагт хорих ангиас суллагдсан. Энэ удаад тэрбээр өөрийн цахим хуудсаараа дамжуулан залуус хорих газарт дүүрэн байгаад эмзэглэж буйгаа илэрхийлжээ. Тэрбээр цахим сүлжээнд жиргэхдээ

“НАМЗХ-ны 24 насны төрсөн өдрийн мэнд хүргэе! Гурван шоронгоор дамжин явахад сэтгэл эмзэглэмээр асуудал нь залуучууд шоронгоор дүүрсэнд байлаа. ЗГ нь манлайлаад НАМЗХ, МЗХ, АЗХ холбогдох ТББ-тай хамтраад хэрэгжихүйц бодлого гаргах шаардлагатай байна. Надад ч бодсон шийдэл байна” гэсэн юм.

УИХ-ын гишүүн асан Н.Номтойбаярыг “Хөдөлмөр эрхлэлтийг дэмжих сан”-тай холбоотой төслүүдийг эргэн төлөлтгүй хэрэгжүүлэх тогтоол гаргаж, улсад 3.9 тэрбум төгрөгийн хохирол учруулсан гэж яллагдагчаар татаж, анхан шатны шүүхээс 5.5 жилийн хорих ял оноосон. Түүний өмгөөлөгчид бүх шатны шүүхэд хандаж,  Улсын дээд шүүхээс Н.Номтойбаярт нийтийн албанд томилогдох эрхийг хоёр жилийн хугацаагаар хасаж, нэг жил хорих ял болгон бууруулж, шийдвэрлэсэн билээ.

Түүнийг 2020 оны УИХ-ын сонгуульд бие даан Хан-Уул дүүрэгт нэр дэвшиж, нэр дэвшигчийн үнэмлэхээ авсных нь дараа цагдан хорьсон. УИХ-ын сонгуульд нэр дэвшигчид үнэмлэхээ гардан авсны дараа сурталчилгаагаа албан ёсоор эхлүүлдэг. Тэгвэл Н.Номтойбаярыг нэр дэвшигчийн үнэмлэх нь баталгаажсаны дараа саатуулсанд ар гэрийнхэн нь хууль зөрчсөн хэмээн шүүмжилж байв.