Баянхонгор аймгийн Бууцагаан сумын Тэмээт багийн Хөх толгой гэдэг газраас малчин Б нь гуравдугаар сарын 26-ны өдрийн 11:00 цагийн орчимд малаа хариулж яваад сураггүй болжээ. Энэ тухай дуудлагыг  гуравдугаар сарын  28-ны өдрийн 15:55 цагт Онцгой байдлын газарт ирүүлжээ.

Дуудлагын дагуу тус аймгийн Онцгой байдлын газрын Бууцагаан сум дахь Гал түймэр унтраах, аврах 72 дугаар анги, цагдаагийн хэсгийн алба хаагчид, ЗДТГ-ын ажилтнуудын хамтаар 40 настай, эрэгтэй Б-г эрэн хайх ажиллагааг гэрээс нь урд зүгт Цагаан гол гэдэг газар хүртэл 10 километрт эхлүүлжээ. Мөн Байдрагийн гүүр гэдэг газар хүртэл 20 км-т явганаар болон автомашинтайгаар зохион байгуулсан боловч үр дүнд хүрээгүй тул эрлийн ажиллагааг зогсоожээ. Өнөөдөр буюу гуравдугаар сарын.29-ний өдрийн 08:00 цагт эрэн хайх ажиллагааг эхлүүлсэн байна.