СХД-ийн нутаг дэвсгэт өчигдөр  21:00 цагийн орчимд  долоон настай хүүхэд гарцаар гарч явахдаа автомашинд мөргүүлэн нас баржээ. Автомашины жолооч согтууруулах ундааны зүйл хэрэглэсэн үедээ тэврийн хэрэгсэл жолоодсон байна.

Зам тээврийн осолд бага насны хүүхэд өртөж буй талаар Тээврийн Цагдаагийн албаны урьдчилан сэргийлэх хэлтсийн мэргэжилтэн Г.Отгонтамир “Энэ оны эхний гурван сард нийт 51 хүүхэд бэртэж, эмтсэн. Үүний  60 хувь буюу 30 хүүхэд автомашинд мөргүүлсэн.  Хөл хорионы үед авто замын осол 60-70 хувь буурч байсан ч дулааны улирал эхэлсэнтэй холбогдуулан хүүхэд багачууд замын хөдөлгөөнд оролцох нь ихэсч, эцэг эхчүүд хараа хяналтаа сулруулж байна. Хамгийн багадаа гуравхан настай хүүхэд зам тээврийн осолд өртөж амиа алдсан харамсалтай хэрэг гарч байсан. Мөн өнгөрсөн 2020 онд хөл хорио тогтоосон үед 64 хүүхэд зам тээврийн ослын улмаас амиа алдсан” гэлээ.

Иймд эцэг эхчүүд бага насны хүүхдүүдэд тавих хараа хяналтаа сайжруулж, анхаарлаа сулруулахгүй байхыг Тээврийн цагдаагийн албанаас анхаарууллаа.

Жолооч нь замын хөдөлгөөний дүрмийн 16.1 дэх заалтын дагуу явган зорчигч гарцаар гарч буй тохиолдолд зам тавьж өгөх үүрэгтэй билээ.