БНХАУ-ын Синофрам үйлдвэрийн вакциныг тариулсан иргэнд сөрөг урвал илэрсэн байж болзошгүй нөхцөл байдал үүсжээ. Энэ талаараа иргэн Г.Бямбасүрэн цахим орчинд тайлбар өгөөд байна. Тэрбээр гуравдугаар сарын 15-нд дархлаажуулалтад хамрагдсан бөгөөд үүнээс хойш цаг орчмын дараа сөрөг урвал ажиглагдаж, хөл нь мэдээгүй болсон байна.

Энэ талаар тэрбээр "Намайг Г.Бямбасүрэн гэдэг. Би 1990 оны арванхоёрдугаар сард төрсөн. Хувийн эмнэлэгт ажилладаг. Вакцин хийлгээд хоёр хөл мэдээгүй болсон. Вакцинаа энэ сарын 15-ны даваа гарагт 16:00 цагт хийлгэсэн. Үүнээс 10 минутын дараа ажиглалт хийхэд зүгээр байсан. Ингээд гараад 40 орчим минутын дараа дотор муухайрч, биеийн байдал тавгүй болсон. Ингээд ажил дээрээ ирээд бөөлжиж явж чадахаа больсон. Удалгүй эмнэлгийн сувилагч рингер, аньлгин, демидрол хийсэн. Гишгэж чадахгүй байсан учраас Хан-Уул дүүргийн эмнэлэгт дуудлага өгч эмнэлэгт хүргэгдсэн. Үүнээс хойш биеийн байдал сайжрахгүй байна. Үүнээс хойш хэд хэдэн удаа эмнэлэгт үзүүлж, одоо Хан-Уул дүүргийн эмнэлэгт хэвтэн эмчлүүлж байна. Одоо ганцаараа явж чадахгүй хүнээр түшүүлж явж байгаа" гэлээ.