Ховд аймгийн Дарви сумын Хөшөөтийн уурхайн ачилтын талбайд өглөөний 10:42 цагийн орчим 26 настай иргэн Д машинд хавчуулагдан нас барсан гэх мэдээлэл гарсан. Тус асуудлаар Ховд аймгийн Цагдаагийн газрын мөрдөн байцаах тасгийн дарга, Цагдаагийн хошууч Ш.Сүхтулгаас тодрууллаа.

-Цагдаагийн байгууллагад тус хэрэг гарсан гэх мэдээлэл хэзээ ирсэн бэ?

-Өглөөний 10:42 цагт иргэн Г-гээс тухайн үйл явдалтай холбоотой мэдээлэл жижүүрийн утсанд ирсэн. Тус мэдээллийн дагуу Ховд аймгийн прокурор, Цагдаагийн байгууллагын алба хаагчид хамтран шалгалж байна.

-Хөшөөтийн уурхайн компани ажилчдын хөдөлмөрийн аюулгүй байдлыг хангаагүй гэх албан бус мэдээлэл байна. Үүнд ямар тайлбар өгөх вэ?

-Энэ талаар тодорхой мэдээлэл өгөх боломжгүй. Хэргийн газарт шалгалт үргэлжилж байна. Ямар компанийн ажилтан амиа алдсан, хэргийн газар чухам юу болсон талаар албан мэдээлэл гараагүй байна. 

-Өмнө нь Ховд аймагт Хөшөөтийн уурхайд хүний амь эрсдэж байсан уу?

-Миний мэдэхээр уурхайтай холбоотой дуудлага, мэдээлэл бүртгэгдэж байгаагүй. Цагдаагийн газрын статистик тоон мэдээллээр ямар хэрэг бүртгэгдэж байсныг хэлж мэдэхгүй.

-Хэргийн газар хяналт, шалгалт хийхээр хичнээн хүн ажиллаж байна вэ?

-Хэргийг шалгахаар тухайн сумын хэсгийн төлөөлөгч, цагдаа нар хяналтанд авсан. Иргэн Д нь ямар шалтгаанаар амь нас эрсдсэн нь тогтоогдоогүй байна. Одоогийн байдлаар хэргийн газарт мөрдөн шалгах ажиллагаа явагдаж байгаа учраас дэлгэрэнгүй мэдээлэл өгөх боломжгүй.