Нийслэлийн Чингэлтэй дүүргийн Онцгой байдлын хэлтсийн Гал түймэр унтраах, аврах 86 дугаар анги шинэ байртай боллоо. Тус дүүргийн ИТХ-ын 2024 оны 09 дүгээр сарын 25-ны өдрийн 43 тоот тогтоолоор 21 дүгээр хороонд Гал түймэр унтраах, аврах 86 дугаар ангийг байгуулахаар шийдвэрлэжээ. Үүний дагуу эл барилгыг барьж, ашиглалтад орууллаа.

Тус ангийн барилга орчин үеийн стандартад нийцсэн, төмөр бетон хийцтэй, 2100 гаруй ам метр талбайтай, А, В, С блокоос бүрдэнэ. Дээд давхартаа албан хаагчдын орон сууцтай.

Гал түймэр унтраах, аврах 86 дугаар анги ашиглалтад орсноор нийслэлийн хойд чиглэлийн 80 гаруй мянган иргэдэд гамшгаас хамгаалах төрийн үйлчилгээг богино хугацаанд шуурхай, хүртээмжтэй хүргэх боломж бүрдэж байна.