НИТХ-ын төлөөлөгч Б.Эрдэнэсүхийг гэр бүлийн хүчирхийлэлийн хэргээр мөрдөн шалгаж, хэргийг прокурорын газарт шилжүүлсэн гэх мэдээлэл гарсан. Учир нь, түүний эхнэр О.Нарангарав нь 22 жилийн турш нөхөртөө зодуулж байгаа тухайгаа олон нийтэд ил болгосон юм. Харин түүнд ёс зүйн ямар хариуцлага тооцох талаар Хотын дарга Х.Нямбаатараас сэтгүүлчид тодрууллаа. Тэрбээр “НИТХ-ын хуралд Сүхбаатар дүүргийн Ардчилсан намаас сонгогдсон Эрдэнэсүх төлөөлөгчтэй холбоотой мэдээллийг хэвлэлээс авч байна. Нэгдүгээрт, НИТХ-ын төлөөлөгч нийслэлийн Тамгын газарт харьяалагддаг албан тушаалтан биш. Хүний гэм буруугийн асуудал шүүхээс шийдэгдэхээс нааш төлөөлөгчийн бүрэн эрхийг дуусгавар болгох асуудал яригдахгүй. Гэр бүлийн хүчирхийлэл үйлдсэн нь шүүхээр тогтоогдох юм бол дараагийн хариуцлагын асуудал яригдана” гэлээ.