Улаанбаатар Олон Улсын кино наадам энэ жил 17 дахь жилээ үргэлжилж байна. Тус наадмын хүрээнд 2026 оны Берлиний олон улсын кино наадмын дэргэдэх Европын кино маркетад “Монгол кино төслүүд” арга хэмжээг зохион байгуулна.

    Арга хэмжээний хүрээнд танилцуулах эхний шатны сонгон шалгаруулалтад 12 уран бүтээлч төслөө ирүүлснээр “Шар хөвийн зэрэглээ”, “Буурал бүсгүй”, “Шонхор”, “94”, “Тарвас”, “Кибер харваач”, “Нойрмог нүд”, “Давс үүрсэн 40” жил зэрэг найман төсөл шалгарч, өнөөдөр эцсийн шатны танилцуулгаа хийлээ.

     Тус уралдааны тэргүүн байрт Эргэлт.мн мэдээллийн сайтын “Давс үүрсэн 40 жил” баримтат кино шалгарсан бол онцлох гурван төсөлд “Тарвас”, “Шонхор”, “Шар хөвийн зэрэглээ” шалгарсан байна. Берлиний олон улсын кино наадамд оролцохоор шалгарсан уран бүтээлчид Берлиний олон улсын кино наадмын (Berlinale) дэргэдэх Европын кино маркетад (European Film Market, EFM)- оролцоход Кино урлагийн зөвлөлөөс дэмжлэг үзүүлэх юм. Энэ удаагийн Улаанбаатар олон улсын кино наадамд анх удаа баримтат кино шалгарсан нь онцлог боллоо. Мөн шалгарсан уран бүтээлчид 2026 оны хоёрдугаар сард Берлиний олон улсын кино наадамд төслөө танилцуулах юм.