Дэлхийн 163 орны аюулгүй байдлыг үнэлдэг Дэлхийн энх тайвны индекс 2025-ын тайлангаар Монгол Улс энэ жил 37-р байрт бичигдлээ. Энэ нь өнгөрсөн жилээс найман байр ахисан үзүүлэлт бөгөөд манай улсын хувьд онцлох дэвшилд тооцогдож байна.

Энэхүү судалгааг жил бүр Австралид төвтэй Эдийн засаг ба энх тайвны хүрээлэн (IEP) гаргадаг. Энэ жилийн жагсаалтыг өмнөх жилүүдийн адил Исланд улс тэргүүлжээ.

Исланд Улс 2008 оноос хойш тасралтгүй хамгийн аюулгүй орноор тодорч буй бөгөөд цэрэгжилтийн түвшин маш бага, зөрчил мөргөлдөөнгүй, цагдаа нар нь хүртэл зэвсэггүйгээр ажилладаг гэдгээрээ онцлог. Хоёрдугаар байранд Ирланд, Шинэ Зеланд хоёр байр ахиж гуравт бичигджээ. Австри, Швейцарь улсууд төвийг сахисан бодлого, энхийг сахиулах уламжлалаа хадгалж ирсэн тул дэлхийн хамгийн аюулгүй орны эхний тавд багтжээ. Манай улс өмнөх жилээс найман байр ахиж, 37-р байрт орсон нь олон улсын хэмжээнд Монголын аюулгүй байдлын түвшин нэмэгдсэнийг харуулж байна. Судалгаанд дурдсанаар манай улсын хувьд:

- Зэвсэгт мөргөлдөөнөөс ангид байх

- Терроризмын эрсдэл харьцангуй бага

- Цэрэгжилтийн түвшин дунд зэрэгт тооцогдох

- Гэмт хэргийн түвшин буурч буй зэрэг нь эерэг үзүүлэлтүүдэд тооцогджээ.

Энх тайвны индексийг 23 үзүүлэлтээр тооцдог бөгөөд гэмт хэрэг, терроризмын түвшин, цэрэгжилт, улс төрийн тогтвортой байдал зэрэг гол шалгуур багтдаг. Энэ жилийн дүнгээс харахад дэлхийн хэмжээнд зэвсэгт мөргөлдөөн, батлан хамгаалах төсөв нэмэгдэж буй нь нийтлэг хандлага болсон ч зарим улс тогтвортой байдлаа хадгалж байгаа нь эерэг дохио гэж судалгааны баг онцолжээ.

Эх сурвалж: Эдийн засаг ба энх тайвны хүрээлэн (IEP)