Хүнс, хөдөө аж ахуй, хөнгөн үйлдвэрийн яам болон Азийн хөгжлийн банктай хамтран хэрэгжүүлж байгаа “Цар тахлын дараах орчинд хүнсний аюулгүй байдлыг сайжруулах” техник туслалцааны төслийн хүрээнд олгож байгаа компьютер болон серверийн тоног төхөөрөмжийг хүлээн авлаа. Энэхүү тоног төхөөрөмжүүд нь тус төслийн хүрээнд хөгжүүлж буй Хүнсний баталгаат байдлын мэдээлэл, хариу арга хэмжээний нэгтгэсэн систем (IFSIRS)-ийг бэхжүүлэхэд чухал хувь нэмэр оруулах юм. Тус IFSIRS нь хүнсний хангамж, хэрэглээ, үнэ ханш, эрсдэлийн хүчин зүйлсийн талаарх мэдээллийг цуглуулж, шинжлэх, шийдвэр гаргагчдад цаг тухайд нь хүргэдэг үндэсний хэмжээний систем бөгөөд хүнсний аюулгүй байдлын бодлогын хэрэгжилтийг хангахад чухал үүрэгтэй.

Эдгээр тоног төхөөрөмжүүдийг суурилуулан нэвтрүүлснээр:

• Өгөгдлийн найдвартай хадгалалт, хамгаалалт сайжирах,
• Шинжилгээ, боловсруулалтын чадавх нэмэгдэх,
• Байгууллагуудын мэдээлэл солилцоо, уялдаа холбоо түргэн шуурхай болох боломж бүрдэх юм.

ХХААХҮЯ-ны Бодлого төлөвлөлтийн газрын дарга Ц.Болорчулуун “ХХААХҮЯ, Азийн хөгжлийн банктай хамтран хэрэгжүүлж байгаа “Цар тахлын дараах орчинд хүнсний аюулгүй байдлыг сайжруулах” техник туслалцааны төслийг хүрээнд хөгжүүлж байгаа “Хүнсний баталгаат байдлын мэдээлэл, хариу арга хэмжээний нэгдсэн мэдээллийн системийг бэхжүүлэхэд зориулсан серверийн тоног төхөөрөмжийг хүлээн авч байна. Азийн хөгжлийн банкны хамт олонд талархал илэрхийлье” гэв.

Азийн хөгжлийн банкны Хөдөө аж ахуй, байгалийн баялгийн салбарын газрын Байгалийн нөөц ба хөдөө аж ахуйн ахлах мэргэжилтэн Юкицугу Янома “ХХААХҮЯ болон Азийн хөгжлийн банкны хамтарсан төсөл ийнхүү амжилттай хэрэгжиж байгаад талархаж байна. Цаашид хүнсний аюулгүй байдлыг хангах, дүн шинжилгээ хийх, мэдээллийн баазыг бүрдүүлэхэд Азийн хөгжлийн банк онцгойлон анхаарч байгаа. Энэ удаагийн төсөл 2025 оны төгсгөлд дуусаж байгаа ч Азийн хөгжлийн банкны зүгээс цаашид хүнсний аюулгүй байдлын тал дээр Монгол Улсын Засгийн газар, ХХААХҮЯ-тай нягт хамтран ажиллах болно” гэдгийг онцоллоо.

Энэхүү дэмжлэг нь Монгол Улсын Засгийн газар болон Азийн хөгжлийн банкны найрсаг түншлэл, харилцан итгэлцлийн тод илэрхийлэл бөгөөд цаашид хүнсний тогтвортой, аюулгүй байдлыг хангах чиглэлд хамтын ажиллагааг улам өргөжүүлэх боломжийг нээж байна.