Монгол Улсын Ерөнхий сайд Гүлэгдэнгийн Занданшатар 2025 оны наймдугаар сарын 8-ны өдөр Баянхонгор-Шаргалжуут чиглэлийн хатуу хучилттай авто замын бүтээн байгуулалтын ажилтай танилцлаа.

Уг төсөл өнгөрсөн 2024 оны зургадугаар сард эхэлсэн бөгөөд өнөөдрийн байдлаар гүйцэтгэл 27 хувьтай байна. Нийт 54.18 километр урттай авто зам тавигдах бөгөөд ус зайлуулах зориулалттай 94 хоолой болон хоёр гүүр барихаар төлөвлөгдөж байгаа юм. Төслийг улсын төсвийн 66.4 тэрбум төгрөгийн хөрөнгө оруулалтаар санхүүжүүлж байгаа бөгөөд “Бридж Бюлдинг” ХХК, “Их Богд Зам” ХХК, “Их Харгуй Зам” ХХК тус тус гүйцэтгэгчээр ажиллаж байна. Шинээр ашиглалтад орсон замын ачаар Шаргалжуутын рашааныг зорих иргэдийн тоо хоёр дахин нэмэгдэж, орон нутгийн иргэдийн орлого нэмэгдэх, аялал жуулчлалын бүс өргөжин тэлэх үр дүн хүлээгдэж байна. Төслийг 2026 оны 11 дүгээр сард бүрэн ашиглалтад оруулахаар төлөвлөжээ.