Монгол Улс 2029 онд олон улсын математикийн олимпиадыг зохион байгуулах эрх авчээ. Энэхүү удаагийн олимпиад нь дэлхийн шилдэг залуучуудыг нэг дор цуглуулах 70 дахь удаагийн арга хэмжээ байх юм.

 Олон улсын математикийн олимпиадын зохион байгуулах Ассоциацаас уг шийдвэрийг албан ёсоор баталгаажуулан Боловсролын сайд П.Наранбаярт мэдэгдсэн. Тэрбээр “Олон жилийн турш тасралтгүй хүчин чармайлт гаргасны үр дүнд, сүүлийн жилүүдэд Монголын багийн амжилт энэ үр дүнг авчирлаа. Монголын Математикийн олимпиадын хорооны хамт олонд гүн талархал илэрхийлье. Монгол Улсад олон улсын математикийн олимпиад зохион байгуулагдах нь шинжлэх ухаан, боловсролын салбарын хөгжилд томоохон түлхэц болж, залуучуудын математикт сонирхол, авьяас чадварыг хөгжүүлэхэд онцгой ач холбогдолтой гэж үзэж байна. Энэхүү арга хэмжээ нь Монголын нэр хүндийг дэлхийд өндөрт өргөж, ирээдүйн чадварлаг математикчдыг бэлтгэх суурь болно” гэв.