Засгийн газрын наймдугаар сарын 6-ны өдрийн хуралдаанаар Эрдэнэт хотод байрлах “Эрдэнэт медикал” эмнэлгийг хойд бүсийн хавдрын оношилгоо, эмчилгээний дэд төв болгон хөгжүүлэх шийдвэрийг гаргалаа.

Энэхүү шийдвэрийн хүрээнд тус эмнэлэг хавдартай иргэдийг орон нутагтаа чанартай оношлуулах, эмчлүүлэх боломжийг бүрдүүлэх бөгөөд ингэснээр Улаанбаатар хот дахь Хавдар судлалын үндэсний төвийн ачааллыг хөнгөлөх томоохон алхам болох юм. “Эрдэнэт медикал” эмнэлэг нь сүүлийн жилүүдэд өндөр хүчин чадалтай тоног төхөөрөмж, мэргэшсэн эмч, мэргэжилтнүүдтэйгээр үйл ажиллагаа явуулж байгаа. Тиймээс хавдрын тусламж, үйлчилгээг бүсчилсэн байдлаар хүргэх, иргэдийн эдийн засаг, цаг хугацааны эрсдэлийг бууруулах нөхцөл бүрдсэн гэж үзэж байна. Энэ хүрээнд шаардлагатай тоног төхөөрөмж, хүний нөөц, төсөв санхүүгийн асуудлыг шат дараатай шийдвэрлэж, тус төвийн үйл ажиллагааг үе шаттайгаар өргөтгөх аж.