“Дунд өргөрөгийн бүсийн сүлжээний 2025 оны олон улсын бага хурал”-ын хүрээнд “Уулархаг бүс нутаг, мөсөн голд учрах аюул болон эрт зарлан мэдээллийн систем” сэдэвт салбар хуралдаан БНСУ-д зохион байгуулагдлаа.

 Хуралдаанд Монгол Улсаас Онцгой байдлын ерөнхий газрын Эрсдэлийн удирдлагын газрын хэлтсийн дарга, хурандаа Д.Базаррагчаа оролцож, “Удаан өрнөлтэй гамшгийн аюулын эрт зарлан мэдээлэл” сэдвээр илтгэл танилцуулан, хэлэлцүүлэг өрнүүлэв. Тус хурлыг наймдугаар сарын 4-5-ны өдрүүдэд БНСУ-ын Солонгосын их сургууль, Монгол Улсын их сургууль, ШУА-ийн Газарзүй, геоэкологийн хүрээлэн, Хас банк, Далайд гарцгүй хөгжиж буй улс орнуудын олон улсын судалгааны төв хамтран зохион байгуулжээ.

“Тогтвортой ирээдүйн төлөө: Нүүрстөрөгчийн саармагжилт ба тогтвортой засаглалын шийдлүүд” сэдвийн хүрээнд болсон тус бага хуралд оролцогчид улс орнуудынхаа туршлага, шийдэл, бодлогын талаар харилцан мэдээлэл солилцсон байна.