Цахим хөгжил, инновац, харилцаа холбооны сайд Э.Батшугар И-баримтын системийг бүрэн цахимжуулах ажлын хүрээнд Монголбанк, Татварын ерөнхий газар зэрэг холбогдох байгууллагын төлөөлөлтэй уулзалт хийлээ. Уулзалтад Монголбанкны дэд ерөнхийлөгч Г.Энхтайван, тус банкны газрын захирал Э.Анар, Татварын ерөнхий газрын дэд дарга А.Энхболд, Санхүүгийн мэдээллийн технологийн төвийн захирал Т.Батбилэг болон бусад албаныхан оролцож, цаасан И-баримтыг халж бүрэн цахимжуулах боломж, шийдлүүдийн талаар санал солилцсон байна.

Сайд Э.Батшугар “Ерөнхий сайд Г.Занданшатарын санаачилгаар И-баримтын буцаан олголтын 2 хувийг 5 хувь болгохоор зорьж буй. Үүнийг хэрэгжүүлэхийн тулд бүртгэлийн үйл явцыг хялбаршуулж, бүрэн цахимжуулах шаардлагатай. Энэ ажил нь Дижитал шилжилтийн чухал хэсэг байх болно” гэв. Одоогийн байдлаар зарим үйлчилгээ cu аппликейшнээр дамжин автоматаар И-баримтыг бүртгэж байгаа бол Хаан банк, Мобиком, Юнител зэрэг байгууллагууд өөрсдийн системийг татварын нэгдсэн системтэй холбосон байна. Тэгвэл энэ жишгийг өргөжүүлж, иргэд худалдан авалт хийх бүрт банкны картаар нь автоматаар И-баримтыг бүртгэдэг болох үйл явцыг эхлүүлжээ.

Монголбанкны дэд ерөнхийлөгч Г.Энхтайван “Аж ахуйн нэгжээр И-баримтаа бүртгүүлж буй тохиолдолд автоматаар бүртгэгдэж байна. Харин иргэдийн хувьд данс бүртгэгдсэн регистрийн дугаартай холбогдсон байвал системд бүртгэгдэх боломжтой. Үүний тулд банкнуудтай хамтран аппликейшн хөгжүүлэх шаардлагатай” гэв.

Санхүүгийн мэдээллийн технологийн төвийн захирал Т.Батбилэг “Кассын системээс мэдээлэл татварын системд дамжуулах дэд бүтцэд техникийн хувьд хүндрэл байхгүй. Гагцхүү иргэн өөрөө аль картаа бүртгүүлэхээ сонгох, мэдээллийн аюулгүй байдал, нууцлалыг хангах асуудал чухал” хэмээн байр сууриа илэрхийлэв. Ийнхүү И-баримтыг бүрэн цахимжуулснаар иргэдийн буцаан олголт бүрэн хэмжээгээр, хүндрэлгүй очих нөхцөл бүрдэхийг холбогдох албаныхан онцолж байна.