Ирэх аравдугаар сард Бахрейн улсад зохион байгуулагдах Азийн залуучуудын III наадамд оролцох Монголын баг тамирчид бэлтгэл сургуулилтаа эхлүүлжээ. Энэхүү олон улсын чанартай тэмцээнд оролцох тамирчид Монголын Үндэсний Допингийн Эсрэг Байгууллагын (МҮДЭБ) албан ёсны сургалтад шат дараатайгаар хамрагдаж эхэлжээ.

Эхний ээлжинд холимог тулааны спортоор өрсөлдөх залуус допингийн талаарх мэдлэг, мэдээлэл олгох сургалтад хамрагдсан бөгөөд уг сургалтыг МҮДЭБ-ын сургалт хариуцсан мэргэжилтэн Э.Онон удирдан явуулсан байна. Тэрбээр тамирчдад допингийн шинжилгээний явц, хориотой бодис хэрэглэсэн тохиолдолд гарч болзошгүй үр дагаврын талаар дэлгэрэнгүй мэдээлэл өгчээ. Мөн бусад төрлийн тамирчид ч Дэлхийн допингийн эсрэг агентлаг (WADA)-ийн цахим сургалтад бүртгүүлж, мэдлэгээ нэмэгдүүлэх боломжтой болж байгаа нь тэмцээний өмнөх чухал алхмуудын нэг гэж үзэж байна.

Азийн олимпын зөвлөлийн гишүүн 45 орны тамирчид оролцох "Бахрейн 2025" наадам нь 2025 оны аравдугаар сарын 21-нээс 31-ний өдрүүдэд зохион байгуулагдах бөгөөд спортын 24 төрлөөр 14-18 насны шилдэг залуус өрсөлдөнө. Энэхүү наадам нь “Сингапур 2009”, “Наньжин 2013”-ын дараах гурав дахь удаагийн зохион байгуулалт бөгөөд "Дакар 2026" Залуучуудын олимпын өмнөх бэлтгэлийн гол цөм болоод байгаа юм. Монгол Улс уг тэмцээнд өргөн бүрэлдэхүүнтэйгээр оролцохоор бэлтгэл сургуулилтаа эрчимтэй үргэлжлүүлж байна.