Говь-Алтай аймгийн Засаг дарга Г.Чинбатын талаар бэлтгэсэн нэвтрүүлгийнхээ баримтыг АТГ-т шалгуулахаар гомдол гаргаж байгаа талаар Зөгий.мн сайтын сэтгүүлч Б.Ууганбаяр мэдээлэл өглөө.

      Тэрбээр "Өнгөрсөн наймдугаар сард Говь-Алтай аймгийн удирдлагууд элсэлтийн ерөнхий шалгалтад амжилттай оролцсон сурагч, багш нарыг шагнаж урамшуулах далимд сумын Засаг дарга болон сургуулийн захиралд мөнгөн урамшуулал олгоно гэсэн мэдээлэл олон нийтийн шүүмжлэлийг дагуулсан. Энэ дагуу бид есдүгээр сарын 3,4-ний өдрүүдэд Говь-Алтай аймагт ажилласан. Тухайн үед тус аймгийн иргэдийн зүгээс баримттай олон мэдээллийг бидэнд ирүүлсэн. Тэдгээр асуудлыг нэгтгээд Говь-Алтай аймгийн Засаг дарга Г.Чинбатаас тодруулж ажилласан. Харин тухайн мэдээлэл тавигдсаны араас тус аймгийн Засаг даргын Тамгын газрын цахим хуудсаар манай редакц болон сэтгүүлчийг хуулийн байгууллагаар шалгуулах болсноо албан ёсоор мэдэгдэж байна гэсэн мэдэгдэл гаргасан. Мэдэгдлийн дагуу өнгөрсөн долоо хоногт Говь-Алтай аймгийн цагдаагийн байгууллагаас бидэнтэй холбогдож, тухайн асуудлаар тайлбар мэдүүлэг авья гэсэн. Бид мэдээ, нэвтрүүлгээ бэлдэхдээ тодорхой баримттайгаар бэлтгэсэн. Гэтэл тухайн аймгийн Засаг даргын нэр төрд халдсан, өрөөнд зөвшөөрөлгүй орсон гэх хоёр үндэслэлээр намайг хуулийн байгууллагаас шалгаж байгаа. Тиймээс би тухайн нэвтрүүлгийг бэлдэх явцдаа ашигласан баримтаа АТГ-д шалгуулахаар өгч байна" гэв.