Улаанбаатар хот болон Архангай, Сэлэнгэ аймагт бүх нийтийн бэлэн байдлын зэрэг буураагүй, хөл хорионы хатуу дэглэм  үргэлжилж буй. Тиймээс нийслэлээс гарах болон орох тээврийн хэрэгсэл, иргэний зорчих хөдөлгөөнд Нийслэлийн мэргэжлийн хяналт, Онцгой байдал, Замын цагдаа, Мал эмнэлэг, Нийслэлийн эрүүл мэндийн газрын мэргэжилтнүүд үргэлжлүүлэн хяналт тавин ажиллаж байна. Авто тээврийн шалган нэвтрүүлэх товчоодоор  үл хязгаарлалтад багтсан аж ахуй нэгжүүд болон шинжилгээнд хамрагдсан иргэд орон нутаг руу буцах хүсэлтийн дагуу нэвтэрч байгаа юм. 

Өчигдөр өглөөний 09:00 цагаас хойш шалган нэвтрүүлэх товчоодоор албан ажил, эрүүл мэнд, ахуйн гачигдалтай болон гэртээ хариж байгаа, хүнс, шатахуун тээвэрлэлт гэсэн шалтгаантай 1497 тээврийн хэрэгслээр 4402 зорчигч хот руу нэвтэрч, 2612 тээврийн хэрэгслээр 9484 зорчигч хотоос гарсан байна. Мөн зөвшөөрөлтэй 3517 тонн түүхий нүүрсийг  93 тээврийн хэрэгслээр зөөвөрлөжээ.