Өчигдөр Онцгой байдлын албанд гал түймрийн тухай гурван дуудлага иржээ. Тодруулбал, “Чингэлтэй дүүргийн IX хороо, Дэнжийн ... гудамжинд байшин шатаж байна” гэсэн дуудлага 10:46 цагт ирсэн байна. Дуудлагын дагуу Чингэлтэй дүүргийн Онцгой байдлын хэлтсийн Гал түймэр унтраах, аврах X ангийн алба хаагчид таван км замыг туулан 10:53 цагт очиж, иргэн Б-ийн 10х8 метрийн хэмжээтэй байшингийн дээврийн хэсэг шатаж байсныг 10 минут ажиллаж унтраасан гэнэ. Мөн тус дүүргийн XVII  хороо, “Сурагчийн .. гудамжинд байшин шатаж байна” дуудлага 14:30 цагийн орчимд бүртгэгдэж, аврагчид иргэн Э-ийн 5х4 метрийн хэмжээтэй байшингийн дээврийн хэсэг шатаж байсныг унтраажээ.

Харин 18:17 цагт Баянзүрх дүүргийн ХХ хороонд “Байшин шатаж байна” гэсэн дуудлагыг хүлээн авчээ. Дуудлагын дагуу тус дүүргийн Онцгой байдлын хэлтсийн Гал түймэр унтраах, аврах 35 дугаар ангийн алба хаагчид зургаан км замыг туулан 18:26 цагт очиж, иргэн Ж-ийн 7х6 метрийн хэмжээтэй байшингийн дээврийн хэсэг шатаж байсныг 25 минут ажиллаж, унтраасан байна.