“No Double Standard” хөдөлгөөний зохицуулагч Д.Монголхүү, Э.Одбаяр нарын залуусыг цагдаагийн байгууллагаас 48 цагийн хугацаатайгаар саатуулаад байгаа. Үүнтэй холбоотойгоор зарим иргэн Хууль зүй дотоод хэргийн сайд Х.Нямбаатарыг огцрохыг шаардаж, Хууль зүй дотоод хэргийн яамны гадна суулт хийсэн. Тэгвэл энэ талаар ЦЕГ-ын МБА-ны дарга, цагдаагийн хурандаа Б.Батсуурь мэдээлэл өгчээ.

Тэрбээр “Иргэн Д.Монголхүү есдүгээр сарын 30-ны өдөр Сүхбаатарын талбайд бүртгэлгүй жагсаал, цуглаан зохион байгуулсан. Улмаар цагдаагийн байгууллага мэдэгдэл шаардлагыг хүргүүлсэн ч хүлээн аваагүй, хууль сахиулагчийн үйл ажиллагааг эсэргүүцсэн. Сүхбаатар дүүргийн прокурорын газар нотлох баримтыг хүргүүлж, Эрүүгийн хуулийн тусгай ангийн 23 дугаар зүйлийн 1-д заасны дагуу хэрэг бүртгэлийн хэрэг нээж, мөрдөн шалгах ажиллагаа явуулсан. 

           Мөрдөн ажиллагааны явцад иргэн Д.Монголхүүг цагдаагийн байгууллага удаа дараа дуудсан боловч ирээгүй, мэдэгдэл хуудас хүлээж аваагүй тул Сүхбаатар дүүргийн шүүхээс захирамж гаргаж, цагдаагийн байгууллага хойшлуулшгүй үйл ажиллагаа явуулж, 48 цагийн хугацаатай баривчлах арга хэмжээ авсан.

           Цаашид Цагдаагийн байгууллагаас хууль ёсны тавьсан шаардлагыг эсэргүүцэж, түүнийгээ олон нийтэд турхирдаг үйл ажиллагааг шалгаж, хууль тогтоомжийн дагуу холбогдох арга хэмжээг авч ажиллах болно" хэмээсэн юм.