Гэрлэх ёслолын ордон нь коронавирусийн халдварын улмаас үйл ажиллагаагаа зогсоогоод жил орчим хугацаа өнгөрч байна. Тус ордон нь үйл ажиллагаа явуулах хүсэлтээ НОК-ын Шуурхай штаб рүү хүргүүлсэн ч зөвшөөрөөгүй байдаг. Иймд ес, аравдугаар сард захиалга өгсөн хуримлагч хосуудынхаа захиалгыг цуцалж эхэлсэн билээ. Өнөөдрийн сайн өдөр хэдэн хос захиалга өгөөд байсан талаар Гэрлэх ёслолын ордны Захиргаа хариуцсан менежер Б.Бүжинлхамаас тодрууллаа.

Б.Бүжинлхам “Гэрлэх ёслолын ордон нь өнгөрсөн жилийн арваннэгдүгээр сараас үйл ажиллагаагаа тогтмол явуулаагүй. Бид үйл ажиллагаагаа хэвийн явуулахаар бэлтгэл ажлаа хангаж, НОК руу хүсэлт явуулсан ч зөвшөөрөөгүй. Тодорхойгүй хугацаагаар үйл ажиллагаагаа явуулах боломжгүй учир ес, аравдугаар сарынхаа захиалгыг цуцалсан. Нийт 150 гаруй хос захиалга өгсөн байсан ч цуцлагдсан. Өнөөдрийн билигт сайн өдөр 70 хос хуримлах байсан. Харамсалтай нь бүх захиалга нь цуцлагдлаа. Бид ажилтнууддаа цалингүй чөлөө өгч, амраасан байгаа” гэв.