Монголын боксын холбооны Ерөнхийлөгч, Хууль зүй дотоод хэргийн сайд Х.Нямбаатар мэдээлэл хийлээ.

                Тэрбээр “Есдүгээр сарын 5-нд Монголын боксын холбооны бага хурал болсон. Энэ хурлаар намайг ерөнхийлөгчөөр томилсон. Ингээд 18:00 цагт хурал дуусаад “Элит” төв дээр 130 хүн нэг, хоёрдугаар хоол идээд тарсан. Ердөө л тэр өдөр болсон үйл явдал. Тэр шөнийн 02:30 минут орчим Сүхбаатар дүүргийн цагдаагийн хэлтэст дуудлага ирсэн байдаг юм билээ. Дуудлагын дагуу цагдаагийн байгууллага очиход тэнд цөөнгүй хүн цаг хэтрүүлж, архи уусан, хоорондоо зодолдсон байдалтай байсан гэсэн. Монголын боксын холбооны удирдах зөвлөл 19 гишүүнтэй юм байна. Би өнөөдрийн байдлаар энэ байгууллагад ороод найм хонож байна. Тэгэхээр МБХ-ны удирдах зөвлөлөөс Э.Цэндбаатарт анхааруулах, сануулах асуудал удаа дараа яригдаж байсан юм байна лээ.

            Тухайлбал, Найрамдал зусланд болсон улсын шигшээ багийн цугларалтыг шөнө орхиж явсан, ковидын үеийн халдвар, хамгаалалтын дэглэм зөрчсөн. Мөн өмнө жил нүцгэлж, сэтгэцэд нөлөөлөх эм бодис хэрэглэсэн. Тэрний өмнө Хандгайтын цугларалтыг тасалж явсан. Манай улсын шигшээ баг татвар төлөгчдийн мөнгөөр цалинжиж, гадаадын тэмцээн уралдаанд явдаг учир сахилга баттай байх ёстой гэдэг тал дээр би удирдах зөвлөлийн гишүүдтэй 100 хувь санал нэгдсэн. Өөрөөр хэлбэл, удирдах зөвлөлийн гаргасан шийдвэр зөв гэдэгт одоо ч итгэлтэй байна. Яагаад гэвэл спорт гэдэг бол сахилга бат. Тэнд Э.Цэнбаатараас өөр боксын спортоор хичээллэж байгаа тамирчин нэг ч байгаагүй. Бусад нь бүгд зодог тайлсан хүмүүс байсан гэдэг мэдээлэл өгсөн.

            Би яг болсон явдлыг хэлж байна. Сэтгүүлч Лодойсамбуугийн хэлж байгаачлан МБХ-ны удирдах зөвлөлийн шийдвэрийг өөрөө тайлбарлаж, өөрийнхөөрөө байр сууриа илэрхийлээд байх юм бол холбоо гэж байх шаардлагагүй. Нэг сэтгүүлч өөрийнхөө сэтгэгдлээр хэнийг тэмцээнд явуулах, хэнийг шигшээ багт байх асуудлыг шийднэ гэж байхгүй. Ч.Лодойсамбууд хандаж хэлэхэд үнэхээр өөрөө хүсэж байвал “Би Монголын боксын холбооны Ерөнхийлөгч болъё” гэдэг хүсэлтээ манай удирдах зөвлөлд хүргүүлэх хэрэгтэй. Ирээд хүсэлтээ тавь, удирдах зөвлөл асуудлыг нь шийдээд Ч.Лодойсамбууг МБХ-ны ерөнхийлөгч болгоход бэлэн байна. Өчигдөр сорил тэмцээн болсон. Шинэ тамирчид, маш олон чадварлаг, сайн залуу гарч ирсэн. Э.Цэндбаатар тамирчин олон удаа ёс зүйн алдаа гаргасан. Уг асуудлыг авч хэлэлцээд хөөх шийдвэр гаргасан. Энэ шийдвэр өөрчлөгдөхгүй. Энэ спортод сахилга бат чухал” гэжээ.