Нийслэлийн Эрүүл мэндийн газраас “Ковид-19” халдварын дараах сэргээн засах эмчилгээг хийх ДЭМБ-ын зөвлөмжийн дагуу төлөвлөгөөт ажлуудыг зохион байгуулж байна. Тухайлбал, “Ковид-19” халдварын дараах сэргээн засах эмчилгээ хийж байгаа туршлага, санал хүсэлт солилцох зорилгоор энэ сарын 6-ны өдөр нийслэлийн сувилал, сэргээн засах төвийн дарга, эмч нартай цахим уулзалт хийлээ. Тус уулзалтад нийт 28 хүн оролцсон бөгөөд “Ковид-19” халдварын дараах сэргээн засах эмчилгээний түр заавар боловсруулах нь зүйтэй хэмээн шийдвэрлэсэн байна.

           Мөн нийслэлийн хүүхдийн сэргээн засах “Хан-Туул” төвөөс “Ивээлт Монгол хүн” НҮТББ-тай хамтран “Эрүүл Монгол хүүхэд” хөтөлбөрийн хүрээнд Төв аймгийн Сэргэлэн суманд Хүүхэд, залуучуудын сургалт хүмүүжлийн тусгай цогцолборт хүмүүжиж буй “Ковид-19” халдвараар өвдсөн 43 хүүхдэд дархлаа сэргээх, чийрэгжүүлэх тусламж үйлчилгээг үзүүлжээ.

           Ташрамд дурдахад, Нийслэлийн хэмжээнд коронавируст халдвараар нийт 123649 хүн өвдсөнөөс 29245 нь хүүхэд гэнэ. Тус вирусээр өвчлөгсдийн дийлэнх нь толгой өвдөх, нойргүйдэх, ядрах, сэтгэл түгшүүртэй, анхаарал төвлөрөхгүй байх зэрэг эмгэг хам шинжээр гурван долоо хоногоос дээш хугацаанд өвчлөх болжээ. Ялангуяа “Ковид-19” халдвараар өвдсөн хүүхдийн дархлаа суларсан, халдварын дараах хам шинж удаан үргэлжилж байгаа үед хичээлийн ачаалал авах, улирлын томуугаар өвдвөл илэрч буй эмгэг хам шинж даамжирч, архаг суурь өвчтэй болох эрсдэлтэй байгаа аж.

Эх сурвалж: Нийслэлийн эрүүл мэндийн газар