Байгаль орчин, аялал жуулчлалын яамнаас Андлалын хөшөөг нурааж эхэлсэн талаар мэдээлэл хийж байна. Энэ үеэр БОАЖ-ын сайд Н.Уртнасан "Хэнтий аймгийн дөрвөн суманд түүхэн аялал жуулчлалыг хөгжүүлэхтэй холбоотой бүтээн байгуулалтуудыг 2018 оноос хойш хийж байгаа. “Андлалын хөшөө”ний зураг төслийг уран барималч УГЗ Д.Эрдэмбилэг гуай зохиосон. БОАЖЯ тухайн ажлыг гүйцэтгэгч “Хос санаа” компанитай гэрээ байгуулж, барилга угсарсан. Яамнаас энэхүү төслийг үргэлжлүүлэхтэй холбоотой судалгааг хийж, Д.Эрдэмбилэг агсны шавь нартай уулзаж, анхны зураг төслөөр нь үргэлжлүүлэх боломж байгаа эсэх талаар үйл ажиллагаа явуулсан. Гэвч оюуны өмчийг эзэмшигч нь барилгын явцад хяналт тавих боломж хязгаарлагдсан учраас зураг төслийг үргэлжлүүлэхэд хүндрэл үүсэж байна гэсэн дүгнэлт гарсан.

      Иймээс Д.Эрдэмбилэг агсны гэр бүлээс “Хос санаа” компанид оюуны бүтээлийг зохиогчийн эрх шилжүүлэх гэрээг цуцлах хүсэлт тавьсан. Мөн тухайн гэр бүлээс БОАЖЯ-нд “Андлалын хөшөө”г  буулгаж, зохиогчийн нэр хүндэд дахин халдахгүй байхыг хүсэж байна гэж хандлаа. Улсын төсвөөс гарсан 1.9 тэрбум төгрөгийг “Хос санаа” компани буцаан төвлөрүүлсэн. Нураахтай холбоотой зардлыг орон нутагт тухайн компани хариуцан ажиллаж байна. Эцсийн тооцооллыг гаргаагүй байгаа. “Андлалын хөшөөг”г нураах зардлыг улсын төсвөөс гаргахгүй" гэлээ.