Замын-Үүд дэх хилийн Мэргэжлийн хяналтын газраас Мэргэжлийн хяналтын ерөнхий газарт мэдүүлээгүй бараа бүтээгдэхүүнийг Монгол Улсын хилээр нуун нэвтрүүлэхийг завдсан зөрчлийн талаар мэдээлэл өглөө. Тухайлбал, зориулалтын бус тээврийн хэрэгслээр, мэргэжлийн хяналтын байгууллагад бүртгүүлээгүй, хаяг шошгын зөрчилтэй, баримт бичиггүй 315 мянган амны хаалтыг эхний удаад, мөн давтан 648 мянган ширхэг амны хаалтыг илрүүлж, арга хэмжээ авсан байна.

Тэгвэл гарал үүсэл нь тодорхойгүй, баримт бичгийн зөрчилтэй, Хятад хаяг шошготой 23 нэр төрлийн хоолны амтлагчийг Улсын хилээр нуун нэвтрүүлэхийг завдсан зөрчил илрүүлж, хуулийн дагуу арга хэмжээ авсан аж. Тус амтлагчид гахайн мах амтлагч, бурам, төмсний цардмал гэх мэт бүтээгдэхүүнүүд багтаж байгаа юм.

Гоо сайхны бүтээгдэхүүнүүдийг хуурамч хаяг шошготой оруулж ирэхийг завдсан зөрчлийг илрүүлэн ажилласан байна. Тус бүтээгдэхүүнд “Oriflame” брэндийн бүтээгдэхүүнийг хуурамчаар үйлдэн оруулж ирэх гэж байжээ. Тус зөрчлүүдэд холбогдох хуулийн дагуу арга хэмжээг авч ажиллаж байгаа аж.