Монгол Улсын Хөдөлмөрийн баатар, олимпын мөнгөн медальт, дэлхийн аваргын хүрэл медальт, дархан аварга Жигжидийн Мөнхбатын нэрэмжит Европын аварга шалгаруулах үндэсний бөхийн шилжин явах цомын төлөөх хоёр дахь удаагийн барилдаан боллоо. Тус барилдаан Унгар Улсын нийслэл Будапешт хотноо 2025 оны аравдугаар сарын 4–5-ны өдрүүдэд Европ дахь монголчууд, бөх сонирхогч үзэгч олны уухай түрлэг дунд амжилттай зохион байгуулагдлаа.

    Европын олон орноос хүрэлцэн ирсэн аймаг, сумын цолтой болон залуу 64 хүчит бөх барилдсанаас Польш Улсаас ирж зодоглосон Ховд аймгийн Мөст сумын харьяат, аймгийн начин Отгонбаярын Пүрэвбаяр түрүүллээ. Их Британи, Умард Ирландын Нэгдсэн Хаант Улсаас ирж барилдсан Сэлэнгэ аймгийн Баруунбүрэн сумын харьяат, сумын заан Буяндэлгэрийн Энх-Амгалан үзүүрлэв.