Өмнөд Солонгосын Кванжу хотод пара байт харвааны дэлхийн аварга шалгаруулах тэмцээн есдүгээр сарын 20-28-ны өдрүүдэд болж байгаа билээ. Тус ДАШТ-д 28 орны эрэгтэй 111, эмэгтэй 65, нийт 176  тамирчин, ганцаарчилсан, багийн болон холимог багийн төрөлд өрсөлдөж байна. Манай улсаас Үндэсний шигшээ багийн дасгалжуулагч Б.Золбоогийн удирдлага дор эрэгтэй гурав, эмэгтэй хоёр тамирчин цэц сорьж байгаа юм.

      Өчигдөр тус тэмцээний холимог багийн төрөлд Үндэсний шигшээ багийн тамирчин Д.Сэлэнгээ, Н.Мөнхбаатар нар алтан медаль хүртэж, төрийн дуулалаа эгшиглүүлэв. Тэд шигшээ харваанд шалгарах замдаа Словенийг 6:0-ээр, Австрали 5:3-аар, Хятадын багийг 5:1-ээр буулган авсан. Финалд Итали Улсын багийг сүүлийн харваанд Монголын оноо 10:10 болж, Италийг 10:9-ээр хожсон байна. Үүнээс өмнө тус тэмцээний эмэгтэйчүүдийн багийн төрөлд Д.Сэлэнгээ, Б.Оюун-Эрдэнэ нар ДАШТ-ий алтан медаль хүртсэн юм.

     Д.Сэлэнгээ, Н.Мөнхбаатар нар пара байт харвааны холимог багийн төрөлд ДАШТ-ээс алтан медаль хүртсэн Монголын анхны тамирчид болж буй бөгөөд өмнө нь ДАШТ-ий багийн төрөлд Д.Сэлэнгээ, Б.Жавхлантөгс нар хүрэл медаль хүртэж байв. Ийнхүү Д.Сэлэнгээ ДАШТ-ий хос алт, нэг хүрэл медальтай тамирчин боллоо.