Дархан нэрээр овоглосон волейболын “DARKHAN MOGULS” баг Монголын бүх ард түмний зуны спортын XVI наадмаас хүрэл медаль хүртлээ. Монголын бүх ард түмний зуны спортын XVI наадам 2025 оны есдүгээр сарын 15–21-ний өдрүүдэд Баянхонгор аймаг болон Улаанбаатар хотод зохион байгуулагдлаа. Тус наадамд 21 аймаг, Улаанбаатар хотын есөн дүүргийн 3258 тамирчин спортын 28 төрлийн 210 ангилалд өрсөлдсөн.

     Тус наадмын волейболын төрөлд “Darkhan Moguls” баг амжилттай оролцож, хүрэл медаль хүртлээ. Шигшээ дөрөвт шалгарсан “Darkhan Moguls” баг гуравдугаар байрны төлөөх тоглолтод “Mintonette Gobi” багийг 3:2-оор ялж, хүрэл медалийн эзэд болсон. Тэд хэсгийн тоглолтодоо 2:3-оор хожигдож байсан ч шийдвэрлэх медалийн төлөөх тоглолтодоо алдаагаа засаж чадлаа.