Монголын бүх ард түмний XVI их наадмын хөнгөн атлетикийн тэмцээнд 16 аймаг, таван дүүргийн 160 гаруй тамирчин оролцож байна. Наадмын эхний өдрийн тэмцээнүүд амжилтаар дүүрэн өндөрлөлөө. Эрэгтэйчүүдийн 800 м-ийн зайн гүйлтэд  Баянзүрх дүүрэг “Алдар” спорт хорооны тамирчин Т. Баасандаш түрүүллээ.

     Харин эмэгтэйчүүдийн 800 м-ийн зайн гүйлтэд Дархан-Уул аймгийн тамирчин Э. Хонгорзул "Спортын мастер" цолны болзол хангасан юм. Ойрын зайн 100 м-ийн шигшээ уралдаанд 1991 оны дэлхийн аварга шалгаруулах тэмцээнд МУГТ Я. Отгончимэгийн тогтоож байсан 12.26 секундын рекорд дээд амжилтыг Орхон аймгийн тамирчин О. Мөнхтүмэн 34 жилийн дараа 12.25 секунд болгож шинэчлэн тогтоолоо. Мөн “4х400 м-ийн холимог буухиа” тэмцээн анх удаа зохиогдож БЗД-ийн “Алдар” спорт хорооны тамирчид дээд амжилтыг тогтоов.