Чөлөөт бөхийн насанд хүрэгчдийн дэлхийн аварга шалгаруулах тэмцээн Хорват Улсын Загреб хотод үргэлжилж байна. “Загреб-2025” ДАШТ-ий эмэгтэйчүүдийн  хамгийн хөнгөн жин 50 кг-ын жинд Азийн аваргын хүрэл медальт, армийн дэлхийн аварга, Үндэсний шигшээ баг, “Алдар” спорт хорооны тамирчин, ОУХМ Бямбасүрэнгийн Мөнхнар хүрэл медалийн төлөө Туркийн хашир туршлагатай бөх, 2017 оны ДАШТ-ий хүрэл медальт, Европын аваргын нэг алт, хоёр мөнгө, гурван хүрэл медальт Эвин Демирхантай барилдаа.

   Барилдааны үндсэн цаг дуусахад 20 секунд дутуу байх үед Б.Мөнхнар 2:0-оор тэргүүлж явсан. Туркийн бөх шийдсэн гар ачих мэхээр хоёр оноо авч 2:2-оор оноог тэнцүүлж, сүүлийн оноо авсан үзүүлэлтээр Туркийн бөх ялалт байгуулав. Манай бөх 20 секундэд сайн хамгаалж гар ачих мэхэнд хоёр оноо алдаагүй байсан бол дэлхийн медальтан болох байлаа, харамсалтай ялагдал байв. Б.Мөнхнард жаахан туршлага, аз, ёндоо л дутлаа.