Бахрейн Улсын Манама хотноо ирэх аравдугаар сарын 22-31-ний өдрүүд зохион байгуулагдах Азийн залуучуудын III наадамд Монгол Улс спортын 23 төрлөөр 200 орчим тамирчин оролцохоор бэлтгэл сургуулилалтаа хангаад байгаа билээ.

    Тус наадамд оролцох Монголын таэквондо-гийн холбоо болон Дугуйн спортын холбооны удирдлагуудыг ОУОХ-ны гишүүн, МҮОХ-ны ерөнхийлөгч Б. Баттүшиг хүлээн авч уулзан, санал сэтгэгдэлийг нь сонслоо.

    МҮОХ-ны зүгээс “Бахрейн 2025” Азийн залуучуудын наадамд оролцох баг тамирчдын бэлтгэл сургуулилалтад зориулж Монголын Таэквондо-гийн холбоонд 10.0 сая, Монголын дугуйн спортын холбоонд 8.0 сая төгрөгийг тус тус олгохоор болов.

    Цаашид тус наадамд оролцох спорт холбоодын төлөөллийг үе шаттайгаар хүлээн авах юм. “Бахрейн 2025” Азийн залуучуудын наадам нь залуучуудын олимпын өмнөх жил болж байгаагаараа онцлог билээ.