Азийн хөл бөмбөгийн холбооны “Challenge League 2025-2026” тэмцээний Зүүн бүсийн урьдчилсан шатны халуухан тулаан өчигдөр 16:00 цагт Монголын хөл бөмбөгийн холбооны Цэнгэлдэх хүрээлэнд амжилттай болж өндөрлөлөө. Монголын дээд лигийн аварга, Монгол Улсаа төлөөлөн энэхүү тэмцээнд оролцсон “СП Фалконс” баг Тайванийн хөл бөмбөгийн хүчирхэг “Тайчунг Футуро” клубийг 3:1-ийн харьцаагаар итгэл төгс буулган авлаа.

     Ийнхүү “СП Фалконс” баг ирэх аравдугаар сард болох “Challenge League 2025-2026” тэмцээний хэсгийн шатанд оролцох эрхээ өвөртөллөө. Энэхүү ялалт зөвхөн “СП Фалконс” багийн ялалт төдийгүй Монголын хөл бөмбөгийн нэр төр, түүхийн шинэ хуудас болон тодоор бичигдэн үлдэж байна.

    Энэ түүхэн тоглолтын баатар бол Узбекистаны довтлогч Риза Айвазов байлаа. Тэрбээр хоёр гоол оруулж, тоглолтыг илүү сонирхолтой болгож, шийдвэрлэх үүргийг нэр төртэй гүйцэтгэлээ. Ийнхүү "СП Фалконс" багийн эв нэгдэл, зөв стратегийн үр дүнд энэ гайхамшиг биеллээ оллоо.

    Монголын хөл бөмбөгийн холбооны Цэнгэлдэх хүрээлэнд хүрэлцэн ирж эзэн багаа дэмжсэн хөл бөмбөгийн хорхойтнууд, дасгалжуулагч, шүүгч, тамирчид, хөгжөөн дэмжигчдийнхээ сэтгэлийн халуун дулаан дэмжлэгт талархал илэрхийлж байна. Хөгжөөн дэмжигчдийн зүрх сэтгэлийн хүч энэхүү түүхэн ялалтын нэгэн чухал хөдөлгүүр байлаа.

    Эх орондоо Азийн хөл бөмбөгийн холбооны “Challenge League 2025-2026” тэмцээний урьдчилсан шатны тоглолтыг амжилттай зохион байгуулж, арын албанд сэтгэл зүрхээ зориулан ажилласан зохион байгуулалтын баг, стратеги боловсруулагчид, багийн бүх гишүүдийн нэмэр их байлаа.