Чөлөөт бөхийн “Хасу-Мегастарс” клубийн тамирчин ОУХМ Нармандахын Насанбуян энэ өдөр мэндэлжээ. Тэрбээр “Ханжоу 2022” Азийн XIX наадмын хүрэл медаль, өсвөр үе, залуучуудын ДАШТ-ий хүрэл медальт, залуучуудын Азийн аварга билээ. Н.Насанбуян Дархан-Уул аймгийн Хонгор сумын Салхи багт төрж, өссөн хүүхэд. Түүнийг бага байхад Салхитад чөлөөт бөхийн секц, дугуйлан байгаагүй гэдэг. Тийм болохоор бөх болох хүсэл мөрөөдөлдөө хөтлөгдөн  Салхитаас Дархан руу явж бэлтгэл хийдэг байжээ. Н.Насанбуянгийн төрсөн дүү нь насанд хүрэгчдийн дэлхийн аварга шалгаруулах тэмцээний хүрэл медальт, ОУХМ  Н.Наранхүү билээ. Тэрбээр ахыгаа дагаж чөлөөт бөхийн тамирчин болсон. Харин ОУХМ Н.Насанбуян өөрөөсөө илүү дүүгийхээ барилдаанд санаа зовдог гэсэн.