Япон Улсын Аичи муж болон Нагоя хотноо 2026 оны есдүгээр сарын 19-өөс аравдугаар сарын 4-ний өдрүүдэд Азийн зуны спортын XX дугаар наадам зохиогдох билээ."Аичи-Нагоя 2026" Азийн наадамд ажиллах сайн дурын ажилтны бүртгэл эхэлснийг Зохион байгуулах хорооноос мэдээлэв.

     Бүртгэл 2024 оны аравдугаар сарын 21-ээс 2025 оны нэгдүгээр сарын 31-ний өдрүүдэд гурван сарын турш үргэлжлэх бөгөөд оролцогч 2026 оны дөрөвдүгээр сарын 1-ний өдрийн байдлаар 18 нас хүрсэн байх шаардлагатай.

    Сайн дурын ажилтнууд Азийн наадам өрнөх хугацаанд тэмцээн зохиогдох газрууд, медиа төв зэрэг байршилд 10 хоногийн турш өдөрт найман цаг ажиллаж олимпизмын их үйлсэд хувь нэмрээ оруулах юм. Азийн наадамд сайн дурын ажилтнаар оролцсоноор олон талт сургалт, хөтөлбөрт хамрагдаж өөрийгөө нээн хөгжүүлэх боломжтой.