Чөлөөт бөхийн “U23” хүртэлх насны Азийн аварга шалгаруулах тэмцээн Йордан Улсын нийслэл Амман хотноо зургадугаар сарын 22-30-ны өдрүүдэд болж өндөрлөсөн билээ. Тус Азийн аваргын тэмцээний эмэгтэйчүүдийн 65 кг-ын жинд хүрэл медаль хүртсэн Б.Ганцэцэгтэй ярилцлаа.

-Чөлөөт бөхийн “U23” насны Ази тивийн аварга шалгаруулах тэмцээнээс хүрэл медаль хүртсэнд баяр хүргэе.

-Баярлалаа.

-Миний дүү өөрийгөө танилцуулахгүй. Аль аймгийн хүүхэд вэ?

-Намайг Батсүхийн Ганцэцэг гэдэг. Дархан хотод төрж, өссөн.

-Бага нас нь хаана өнгөрөв?

-Бага насаа Дархан хотдоо өнгөрүүлсэн.

-Одоо ямар сургуульд сурч байгаа вэ?

-Монголын үндэсний биеийн тамирын дээд сургуулийн гуравдугаар курсийн оюутан.

-Чухам яагаад чөлөөт бөхийн спортыг сонгон хичээллэх болсон бэ?

-Намайг есөн настай байхад эмээ маань Дархан хотын БТСГ-ын чөлөөт бөхийн секцэнд анх хөтлөн оруулж өгсөн. Эмээгийн ач тусаар би өдий зэрэгтэй тамирчин болж яваа. Анх секцэнд орохдоо чөлөөт бөх гэж юу байдгийг ч мэдэхгүй л очсон. Түүнээс хойш нэлээдгүй цаг хугацаа өнгөрч хичээллэх тусам улам бүр чөлөөт бөхийн спортод шимтэн дурлах болсон.

-Чөлөөт бөхөөс өмнө өөр спортын төрлөөр хичээллэж байсан уу?

-Чөлөөт бөхөөс өөр спортын төрлөөр хичээллэж байгаагүй. Анх сонгон орсон чөлөөт бөхийн спортоороо одоог хүртэл тууштай хичээллэж байгаа.

-Чөлөөт бөхөөр хэд дэх жилдээ хичээллэж байгаа вэ?

-12 дахь жилдээ хичээллэж байна.

-Чөлөөт бөхийн “А” үсгийг заасан анхны багш нь хэн бэ?

-Анх Дархан хотын БТСГ-ын дасгалжуулагч Ёндонпүрэвийн Батдархан багшаараа заалгасан. Дараа нь “Хасу мегастарс” клубийн МУГД Цэндийн Баярсайхан багш дээрээ очиж, одоог хүртэл хичээллэж байгаа.

-Насанд хүрэгчдийн УАШТ-д барилдаж байсан уу?

-Насанд хүрэгчдийн УАШТ-ээс 2023 онд 59 кг-ын жинд мөнгөн медаль хүртэж байсан.

-Йордан Улсын нийслэл Амман хотод болсон “U23” насны Ази тивийн аварга шалгаруулах тэмцээний 65 кг-ын жинд тойргоор барилдсан юм уу?

-Манай жинд таван бөх байсан. Тойргоор хоорондоо барилдсан. Эхний тойрогт Киргизстаны Дилназ Сазановад 10:7-оор хожигдсон. Түүний дараа хоёрдугаар тойрогт Казахстаны Гулсезим Бухаеваг 10:0-ээр ялсан. Гуравдугаар тойрогт Энэтхэгийн Антим Антимд 15:10-аар ялагдсан. Сүүлийн барилдаандаа Тайванийн Пайг 13:0-ээр цэвэр ялж, хүрэл медаль хүртсэн.

-Киргизстаны бөхтэй ойролцоо барилдаад сүүлийн мөчид хожигджээ. Ямар алдаанаас болж хожигдол хүлээсэн бэ?

-Киргизстаны тамирчинтай барилдахдаа хэт яарч алдаа гаргасан. Барилдааны эхнээс тэргүүлэн, оноо авч хожих гэсэндээ хэтэрхий их яарч, хяналтаа алдсан тал бий.

-Энэтхэгийн бөхийг ялах боломж байсан уу?

 -Энэтхэгийн бөхийг хожих боломж илүү өндөр хувьтай байлаа. Түүнийг цэвэр дарах ч боломж байсан л даа. Тэр боломжийг би өөрөө л ашиглаж чадалгүй хожигдсон.

-Гаргасан амжилтуудаас танилцуулахгүй юу?

-Залуучуудын УАШТ-д 2021, 2022, 2023 онд түрүүлж байсан. Насанд хүрэгчдийн УАШТ-д 2023 онд мөнгөн медаль хүртсэн.

-Энэ онд оролцох ямар томоохон тэмцээнүүд  байгаа вэ?

-Ирэх аравдугаар сарын 21-27-ны өдрүүдэд болох “U 23” ангиллын ДАШТ бий.