"Ханжоу-2022" Азийн XIX наадмын байт харвааны сонгодог төрлийн ганцаарчилсан ангилалд Үндэсний шигшээ баг,  “Алдар” спорт хорооны тамирчин, ОУХМ Баатархуягийн Отгонболд алтан медаль хүртэж, “Парис 2024” олимпыг зорих эрх хүртсэн билээ.  Б.Отгонболд Монгол Улсын байт харвааны спортод 45 жилийн дараа анхны алтан медалийг эх орондоо авчирч түүхэн амжилт тогтоосон. Энэ нь дэлхийн аварга, МУГТ Д.Дэмбэрэл, 2008 оны Бээжингийн паралимпаар Хөдөлмөрийн баатар, гавьяат тамирчин Д.Баатаржав нараас хойш гаргасан хамгийн том амжилт, Азийн наадмын анхны алтан медаль байлаа.

         ОУХМ Б.Отгонболд “Ханжоу 2022” Азийн XIX наадмын алтан медалийн төлөөх өрсөлдөөнд Хятадын харваач Жи Шиан Шоуг ялж Азийн наадмын аварга болсон. Түүний давуу тал нь догдлол, сэтгэл хөдлөлөө дарж чаддаг. Сэтгэл зүй тогтвортой, тайван харваач юм. Хөгжөөн дэмжигчдийн нүргэлсэн их, шуугиан, дуу чимээн дунд төвлөрч, тайван харваж чаддаг онцлогтой. Олимп, дэлхийн медальтай ямар ч тамирчинтай харвахад биеэ барих, сандрах, айж бэргэх асуудал байдаггүй. Өөртөө бүрэн итгэлтэй төвлөрч харваж чаддаг. Энэ бүхэн нь түүний өндөр амжилт гаргах үндэс болдог юм билээ.

        Тэрбээр анх Жакартагийн Азийн наадамд 2018 онд оролцож байсан. Холимог баг болон эрэгтэй багийн харваанд хүрэл медалийн төлөө харваж ялагдаж байв. ДАШТ-д хоёр удаа, Азийн аварга, дэлхийн цом гээд олон улсы тэмцээнд оролцож байсан. Байт харваагаар 2009 оноос эхлэн “Алдар” спорт хороон дээр хичээллэсэн. Түүнээс хойш 15 дахь жилдээ байт харваагаар хичээллэж байгаа.