“Ханжоу-2022” Азийн наадмаас алтан медаль хүртсэн, МУГТ Б.Чинзоригоос допинг, сэргээшийн төрлийн  хориглосон эм, бодис илэрсэн. Тэрбээр “Б” сорьцын шинжилгээ өгөхгүй шууд Олон улсын спортын Арбитрын шүүхэд хандаад байгаа билээ. МУГТ Б.Чинзоригоос Дэлхийн допингийн эсрэг агентлагийн хориглосон эмийн “S1” ангилалд багтдаг метандиенон, метаболит бодис илэрсэн байдаг. Тиймээс ч тэрбээр “Б” сорьцын шинжилгээ өгөхгүй шууд Арбитрын шүүхэд хандсан аж.

          Энэ нь 2024 оны Парисын олимпод оролцох гарц, боломж байж болох тул ийнхүү цаг алдахгүй шүүхэд ханджээ. Хэрэв Б.Чинзориг Олон улсын спортын арбитрын шүүхэд “Допингийн төрлийн бодис хэрэглэх болсон шалтгаан, хэн хэрэглэхийг зөвлөсөн” зэргээр “Үнэнээ өчвөл” тус шүүхээс хамгийн бага буюу зургаан сарын хугацаагаар эрхийг нь хасах шийтгэл оноох боломжтой юм байна. Тиймээс тэрбээр энэ боломжийг ашиглахаар ийнхүү шуурхай шүүхэд хандсан байж магадгүй.

         Спортын Арбитрын шүүхэд хандсан цаг хугацаанаас эхлэн ямар шийтгэл оноосон хугацаа нь тооцогддог аж. Өөрөөр хэлбэл Олон улсын спортын арбитрын шүүхээс Б.Чинзоригт хамгийн бага шийтгэл болох зургаан сарын хугацаатай эрхийг нь хасах тохиолдолд түүний эрх ирэх 2024 оны дөрөвдүгээр сард сэргэнэ. Хэрэв ирэх нь сэргэвэл тэрбээр ирэх 2024 оны олимпод оролцох боломжтой болох юм.

        Б.Чинзориг эрүүл мэндийн шалтгаанаар дээрх төрлийн бодисын найрлага бүхий эмийг хэрэглэсэн байх магадлалтай. Эсвэл түүнд хүчний бэлтгэлийн багш, дасгалжуулагч нар нь хэрэглэхийг зөвлөсөн байж болзошгүй байгаа юм.