Олон улсын оюутны спортын холбооны “FISU” 38 дугаар ерөнхий ассамблейн (ЕА) тайлан сонгуулийн чуулган өнөөдөр Швейцарь Улсын Женев хотноо эхэллээ. Тус чуулганд 115 орны 200 орчим төлөөлөгчид оролцож байна. Чуулганыг нээж ОУОСХ-ны ерөнхийлөгчийн үүрэг гүйцэтгэгч Леонц Эдер үг хэллээ.

         Чуулганы үйл ажиллагаанд амжилт хүсч Швейцарийн холбооны Улсын спортын газрын дарга Маттхиас Ремунд үг хэлсэн байна. Тэрбээр оюутан ахуй үедээ дөрвөн удаа өвлийн универсиад наадамд цанын төрлөөр оролцож байжээ. Түүнчлэн баяр хүргэн Женев хотын их сургуулийн проректор Степане Бертгет үг хэлэв.

         Чуулган энэ сарын 17-18-ны өдрүүдэд Женев хотын “Хилтон” зочид буудалд үргэлжлэн явагдана. Чуулганд Монгол Улсыг төлөөлөн МОСХ-ны ерөнхийлөгч Д. Баясгалан, Ерөнхий нарийн бичгийн дарга Д. Жаргалсайхан нар оролцож байна.