Оюутны 3х3 сагсан бөмбөгийн ДАШТ-ий шилдэг найман багийн дөрвөн тоглолт өчигдөр орой Катар Улсын Доха хотноо болж өнгөрлөө. FISU “World Cup 2023”-д Монголын эмэгтэй баг, Румын Улсын багтай хүч тэнцүү тоглолт хийн, үндсэн цагт 14:14 оноогоор тэнцсэн юм.

      Тоглолтын төгсгөлд манай “3” дугаартай тамирчин хоёр удаагийн торгуулийн шидэлт хийсэн боловч, амжилтгүй болсон. Хэрэв оноо авсан бол үндсэн цагт хожих бололцоо Монголын багт байлаа. Нэмэлт цагийн тоглолтод Румын Улсын баг 14:16-аар хожин шилдэг дөрвөн багт шалгарлаа. Тэд цагариг доороос довтлон хоёр оноо авч чадсан юм.

      Хэрэв манай баг энэ тоглолтод хожсон бол Египет Улсын багтай медалийн төлөө тоглолт хийх байв. Монголын багийн залуу тоглогч нарт ихээхэн сургамж авах, туршлага суулгах тэмцээн болж өнгөрлөө  МОСХ-оос дөрвөн тамирчны зардлыг олон улсын байгууллагаар шийдвэрлүүлэн, бүртгэлийг хийлгэн энэ тэмцээнд оролцох боломжийг олгожээ.

          Баг тамирчдыг бүрдүүлэн, зохион байгуулан оролцсон “Рояаль” Олон улсын их сургууль, “Royal International University” болон багийн ахлагч М. Өсөхбаяр, дасгалжуулагч С. Тулга нарын хүчин зүтгэл их байв. Энэхүү тэмцээн 2024 онд дахин зохиогдох ба Азийн оюутны аварга шалгаруулах тэмцээнээс шалгарсан багууд тивээ төлөөлөн оролцоно. Ази тивийн сонгон шалгаруулах тэмцээн 2024 оны эхний хагас жилд явагдана.