Монголын жүдо бөхийн Үндэсний шигшээ багийн тамирчид энэ оны сүүлийн тэмцээндээ оролцохоор Япон Улсыг зорилоо. Тэд ирэх сарын 2-3–ны өдрүүдэд Токио хотод зохион байгуулагдах “Токио 2023” гранд слам тэмцээнд Монгол Улсын 21 жүдоч өрсөлдөнө.  Тус их дуулга тэмцээнээс өмнө манай баг, тамирчид 14 хоног Япон Улсын “Кокушикан” их сургууль, “Нихон” их сургууль, “Токай” их сургуулиудад Үндэсний шигшээ багийн дасгалжуулагч Ч.Болдбаатар, М.Бундмаа нарын удирдлага дор хамтарсан бэлтгэлд хамрагдана.  “Кокушикан” их сургуулийн бэлтгэлийг одоогийн Японы шигшээ багийн ахлах дасгалжуулагч Кейжи Сүзүки, “Нихон” их сургуулийн хамтарсан бэлтгэлийг дэлхийн хоёр удаагийн аварга Юүка Нишида нар удирдах юм.

        Л.Эрдэнэчимэг захиралтай “Монос” группын хамт олон Д.Ганбаатар захиралтай “Макс” группын хамт олон, мөн Монголын үндэсний олимпын хороо, МИАТ ТӨХК  хамт олон жүдогийн тамирчдын хамтарсан бэлтгэлд хамрагдахад санхүүгийн туслалцаа үзүүлсэн байна.