Япон Улсын Меи мужийн Цү хотноо олимп, дэлхийн аварга, алдарт Саори Ёшидагийн нэрэмжит чөлөөт бөхийн тэмцээн энэ сарын 3-5-ны өдрүүдэд амжилттай болж өндөрлөлөө. Тус тэмцээнд 101 багийн 883 өсвөр үеийн тамирчид хүч чадлаа сорин өрсөлдсөн байна.

        Тус тэмцээнд  Монгол Улсаас Л.Энхбаяр, Ц.Бат-Эрдэнэ дасгалжуулагчтай Төв аймгийн “Төв-Арж” баг, Г.Нямбаяр дасгалжуулагчтай Спортын төв сургууль, М.Мөнхбат дасгалжуулагчтай СХД-н “Оргил” клубуудын нийт 21 тамирчин, дөрвөн дасгалжуулагч Олон улсын шүүгч Ж.Лхагвасүрэнгийн хамт амжилттай оролцсон байна.

Энэ удаагийн тэмцээний алтан медалийг Ү.Мөнхчимэг “Төв-Арж” клуб, М.Оюутсондор, СХД-ийн “Оргил” клубийн тамирчид хүртжээ. Харин мөнгөн медалийг Б.Чулуун-Эрдэнэ “Төв-Арж” клуб, Э.Наранбаяр “Төв-Арж” клубийн тамирчид, хүрэл медалийг Б.Манлай “Төв-Арж” клубийн тамирчин хүртсэн байна.